اللحم بالبرقوق ديال الاعراس
غنحتاجو قطع من اللحم و من الأفضل إيكون الملج كيكون رطب و زوين في التقديم ،ملح ،إبزار ،سكين جبير ،قرفة ،بسيبيسة ،خرقوم ،ملون ،سمن ،كأس زيت مخلط رومي و زيت زيتون ،ثوم مدقوق ،معدنيس مقطع و إلا كان قسبر يكون أحسن ،بصلة مشلضة .
للتزيين غنحتاجو برقوق ،سكر ،قرفة ،لوز مقلي ،شوية زنجلان نسيت ماصورتوش

الطريقة : اللحم بالبرقوق ديال الاعراس
كناخدو ليقامة ديالنا كنخلطوها بالزيت و كنشرملو فيها اللحم و إلا كان عندنا الوقت نخلوه مرقد تم نحطوه فوق النار و نشحروه شوية ثم نزيدو البصلة و نشحرو مزيان ثم نضيفو كأس ماء و نغطيو الطنجرة و نقصو العافية و نخلوه إيطيب مزيان.
ثم كنوجدو البرقوق كناخدو المرقة من اللحم أثناء الغليان ونطيبو فيه البرقوق لي كنكونو فزكناه بالماء الساخن باش تزول لكحولة و كنوضعو القرفة عواد على البرقوق ثم السكر أو العسل ونعسلو البرقوق مزيان
اللوز كنصلقوه ونقليوه ونخليوه يبرد حتى لوقت التقديم .
ملي طاب اللحم ديالنا و ختارت المريقة كنصبوه في طبسيل و كنزينو بالبرقوق و الزنجلان المحمر و اللوز واكلة شهية .